Të paktën 22 persona kanë humbur jetën dhe dhjetëra të tjerë janë plagosur nga sulmet masive ruse gjatë natës në disa qytete të Ukrainës. Presidenti ukrainas Volodymyr Zelensky i ka cilësuar sulmet si ndër më “mizoret” e kryera nga Rusia.
Sulmet goditën qytete si Pryluky, Kyiv, Dnipro, Kremenchuk, Zaporizhzhia dhe Oleksandriya. Në Pryluky, në rajonin e Chernihivit, u shkatërrua një pallat pesëkatësh, ndërsa autoritetet ukrainase raportuan se 16 persona humbën jetën, mes tyre katër fëmijë. Rreth 50 persona të tjerë u plagosën, përfshirë shtatë fëmijë, ndërsa ekipet e emergjencave vijojnë kërkimet për persona që mund të kenë mbetur nën rrënoja.
Zelensky tha se Rusia lëshoi rreth 70 raketa gjatë sulmeve, duke synuar edhe infrastrukturën energjetike të Ukrainës. Sipas tij, mbrojtja ajrore ukrainase arriti të rrëzojë vetëm një pjesë të raketave.
Dy persona u vranë dhe tetë u plagosën në Dnipro dhe Kremenchuk, ndërsa dy viktima u raportuan në Kyiv dhe dy të tjera në Oleksandriya.
Presidenti ukrainas deklaroi gjithashtu se Ukraina ka kryer sulme hakmarrëse ndaj objektivave në rajonet ruse Perm, Samara dhe Astrakhan, duke përfshirë dy objekte nafte dhe një poligon stërvitor. Ai tha se pati gjithashtu një kundërpërgjigje në Detin e Zi.
Në një tjetër zhvillim, një anije nafte me flamur liberian u godit nga mjete pa pilot pranë Soçit, ndërsa autoritetet ruse deklaruan se ekuipazhi u shpëtua. Ndërkohë, Bullgaria ka ndërprerë kërkimet për ekuipazhin e një anijeje tjetër që u fundos pasi u godit nga një dron në Detin e Zi. Raportohet se anija “Alfa Uatan” u fundos rreth 130 kilometra në lindje të Byalas, ndërsa nuk dihet ende fati i ekuipazhit.
Një anije tjetër që transportonte grurë u godit gjithashtu brenda zonës ekonomike ekskluzive të Bullgarisë, por të 18 anëtarët e ekuipazhit u shpëtuan.
Rusia nuk ka komentuar ende sulmet e fundit, ndërsa Zelensky u ka bërë sërish thirrje aleatëve për të forcuar mbrojtjen ajrore të Ukrainës.
Burimi: botasot.info
