Të paktën gjashtë palestinezë, përfshirë një fëmijë, janë vrarë në një sulm ajror izraelit ndaj një zone pranë portit të qytetit të Gazës, ndërsa më shumë se një duzinë personash janë plagosur.
Sipas autoriteteve shëndetësore palestineze, sulmi goditi një kafene ku ishin strehuar persona të zhvendosur. Spitali Shifa në qytetin e Gazës raportoi se kishte marrë pesë trupa dhe 13 të plagosur, ndërsa një prej të plagosurve ndërroi jetë pak më vonë.
Dëshmitarët thanë se shpërthimi goditi kafenenë “Sweet and Bitter”, në portin e peshkimit në pjesën perëndimore të qytetit. Sipas dëshmive, shpërthimi i hodhi disa prej viktimave në det.
Ushtria izraelite konfirmoi se kishte kryer një “sulm ajror preciz”, duke deklaruar se objektivi ishin komandantë të Hamasit që po planifikonin sulme kundër forcave izraelite në Rripin e Gazës.
Në një deklaratë tjetër, ushtria izraelite tha se kishte goditur një takim të drejtuesve të një njësie elitare të Hamasit, ku ndodhej edhe një person që, sipas saj, kishte marrë pjesë në sulmet e 7 tetorit 2023.
Izraeli deklaroi se kishte marrë masa për të kufizuar rrezikun ndaj civilëve, ndërsa Hamasi e dënoi sulmin, duke e cilësuar si një tregues të “shpërfilljes” së thirrjeve për armëpushim nga ndërmjetësit dhe vendet garantuese.
Sulmi ndodhi një ditë pas takimit në Jerusalem mes të dërguarit amerikan Jared Kushner dhe kryeministrit izraelit Benjamin Netanyahu. Netanyahu ka deklaruar se Izraeli nuk do të tërheqë forcat nga Gaza për sa kohë Hamasi nuk është çarmatosur plotësisht.
Ndërkohë, Hamasi ka deklaruar se mbetet i angazhuar për zbatimin e planit amerikan të paqes dhe i ka kërkuar administratës së Presidentit Donald Trump të ushtrojë presion mbi qeverinë izraelite për zbatimin e tij.
Sipas mediave izraelite, operacionet ushtarake në Gaza janë zvogëluar ditët e fundit, mes presionit të SHBA-së, ndërsa ushtria thotë se vazhdon të veprojë kundër militantëve dhe në rastet kur forcat e saj konsiderohen të kërcënuara.
Burimi: botasot.info
