Liverpooli do të luajë të shtunën ndaj Wolverhampton Wanderers në kuadër të javës së 18-të të Premier League, një ndeshje me ngarkesë të veçantë emocionale.
Në mesazhin e Krishtlindjes drejtuar tifozëve, trajneri i Reds, Arne Slot, i kushtoi një homazh të ndjerë Diogo Jotës, sulmuesit portugez që kishte veshur fanellën e të dyja skuadrave dhe që humbi jetën në një aksident automobilistik korrikun e kaluar.
“Është Krishtlindja e parë pa të dhe dhimbja do të ndihet edhe më fort të shtunën, kur dy ekipet angleze të Diogos do të përballen për herë të parë pas vdekjes së tij tragjike”, shkroi Slot, duke shprehur gjithashtu solidaritetin dhe mendimet e tij për familjen e lojtarit.
Trajneri holandez theksoi se skuadra synon ta mbyllë vitin në mënyrën më të mirë të mundshme. Ai pranoi se Liverpooli ka treguar shenja përmirësimi javët e fundit, por njëkohësisht nënvizoi se ende ka hapësirë për rritje. Kampionët në fuqi renditen aktualisht në vendin e pestë në tabelë, me dhjetë pikë më pak se lideri Arsenal.
Burimi: botasot.info
