Rreth 50 tifozë të maskuar, të cilët sipas mediave austriake, dyshohen se janë nga Serbia, tentuan mbrëmë të arrinin në këmbë autostradën A2 pranë Traiskirchen-it, me dyshimin se synonin të ngrinin pritë ndaj tifozëve të skuadrës kroate Zara.
Skandalin serb, policia austriake e parandaloi.!
Sipas portalit austriak “Krone”, policia mori disa njoftime nga qytetarët rreth orës 21:00, të cilët raportuan grumbullime të dyshimta dhe incidente pranë autostradës A2.
Menjëherë u angazhuan patrulla të shumta policore, ndërsa në operacion u përfshi edhe një helikopter.
Në vendngjarje, policia identifikoi një grup prej rreth 50 personash.
Sipas informacioneve jozyrtare, bëhej fjalë për huliganë serbë, rivalë të tifozëve kroatë, të cilët dyshohet se kishin planifikuar një përleshje pas ndeshjes së ABA League mes ekipit austriak Vienna dhe Zarës, e zhvilluar po atë mbrëmje dhe e fituar nga kroatët me rezultatin 86:77.
Personat e maskuar kishin parkuar automjetet e tyre pranë autostradës dhe më pas tentuan t’i afroheshin rrugës në këmbë. Gjatë ndërhyrjes së policisë nuk pati arrestime, por u sekuestruan mbi 40 shkopinj, si dhe objekte të tjera të përshtatshme për shkaktimin e trazirave.
Ende nuk ka një konfirmim zyrtar për detajet e plota të incidentit, por autoritetet austriake nuk e përjashtojnë mundësinë që i gjithë aksioni të ketë qenë i organizuar paraprakisht.
Burimi: botasot.info
