Platforma TikTok në pronësi të kompanisë kineze ByteDance shumë afër shitjes, pasi presidenti i Shteteve të Bashkuara të Amerikës Donald Trump ka zbuluar detaje rreth blerësit.
Në një intervistë të transmetuar sot në televizionin Fox News, Trump tha se kishte gjetur një blerës për TikTok – një grup “njerëzish shumë të pasur”, të cilët ai do t’i zbulojë brenda rreth dy javësh, raporton KosovaPress.
Më herët në qershor, Trump nënshkroi një urdhër ekzekutiv për të mbajtur TikTok në SHBA për nëntëdhjetë ditë të tjera, për t’i dhënë administratës së tij më shumë kohë për të ndërmjetësuar një marrëveshje për ta sjellë platformën e mediave sociale nën pronësinë amerikane.
Është hera e tretë që Trump e ka zgjatur afatin, pas urdhrit ekzekutiv më njëzet janar, pasi platforma u mbyll për pak kohë kur hyri në fuqi një ndalim kombëtar i miratuar nga Kongresi dhe i mbështetur nga Gjykata Supreme e Shteteve të Bashkuara të Amerikës.
E dyta ishte në prill kur zyrtarët e Shtëpisë së Bardhë besuan se po i afroheshin një marrëveshjeje për të ndarë TikTok në një kompani të re me pronësi amerikane, e cila u shpërbë pasi Kina u tërhoq pas njoftimit të tarifave të Trump.
Nuk është e qartë se sa herë Trump mund ose do të vazhdojë ta zgjasë ndalimin, ndërsa qeveria vazhdon të përpiqet të negociojë një marrëveshje për TikTok.
Trump ka grumbulluar mbi pesëmbëdhjetë milionë ndjekës në TikTok që kur u bashkua vitin e kaluar.
Burimi: botasot.info
