UEFA ka marrë vendim lidhur me rastin e paprecedentë të ndeshjes së Ligës së Kampionëve mes Lech Poznan dhe Crvena Zvezda, ku në tribuna u shfaq baneri provokues me mbishkrimin “Kosova është Serbi”.
Ky veprim u konsiderua shkelje e rëndë e rregullave disiplinore, të cilat ndalojnë shprehimisht mesazhet politike në arenat sportive.
Institucioni më i lartë i futbollit evropian ka vendosur ta gjobisë klubin polak Lech Poznan me 10 mijë euro për këtë incident. Megjithatë, dënimi nuk ndalet me kaq, pasi për një sërë shkeljesh të tjera gjatë së njëjtës ndeshje, klubi është detyruar që në total të paguajë 48 mijë euro.
Ky incident i banerit provokues është vetëm një nga shumë rastet e mëparshme ku politika dhe futbolli janë përzier në mënyrë të dëmshme, duke cenuar frymën e fair play-t, respektin mes popujve dhe parimin e neutralitetit sportiv që UEFA synon të mbrojë.
UEFA ka theksuar vazhdimisht se stadiumet nuk duhet të shndërrohen në hapësira për mesazhe politike apo nxitëse, duke paralajmëruar masa edhe më të ashpra në rast përsëritjeje të incidenteve të tilla.
Burimi: botasot.info
