Sherif Rrahmani ka reaguar ashpër ndaj një postimi të Bujar Osmanit, duke e akuzuar atë për keqpërdorim dhe manipulim në kuadër të fushatës zgjedhore.
Ai ka bërë të ditur se personi i paraqitur në fotografinë e publikuar nga Osmani është nëna e tij, e cila është nga Likova dhe nuk ka asnjë lidhje me Çairin. Sipas Rrahmanit, ajo nuk e njeh Bujarin dhe është manipuluar nga persona që i kanë thënë se Osmani është pjesë e koalicionit VLEN.
“Me vjen keq që është manipuluar pa dijeni nga disa njerëz, dhe gjitha fjalët që i ka thënë, i ka thënë duke menduar se Bujari është nga VLEN-i. Përndryshe, unë jam dhe vazhdoj të jem kryetar i nëndegës së Alternativës në Likovë dhe mbështetës aktiv i koalicionit VLEN. Nana ime, familja ime dhe gjithë miqtë e mi janë përkrahës që më japin motiv të vazhdoj këtë rrugë tash e disa vite”, ka shkruar Rrahmani.
Ai e ka ftuar publikisht Bujar Osmanin të fshijë fotografinë dhe të ndalë, siç thotë ai, manipulimet dhe gënjeshtrat, duke shtuar se është për të ardhur keq që niveli i fushatës ka rënë në këtë pikë.
“Turp!”, ka përfunduar reagimin e tij Rrahmani.
