Shefi i ndihmave të Kombeve të Bashkuara vlerësoi sot “përmasat kolosale të detyrës” për rivendosjen e kushteve bazë të jetesës në Rripin e Gazës, i cili është kthyer në rrënoja, ndërsa Izraeli mori trupin e një pengu tjetër të 7 tetorit, teksa armëpushimi hyri në javën e dytë.
Mes një autokolone automjetesh të OKB-së, koordinatori i ndihmave Tom Fletcher dhe ekipi i tij kaluan mes rrënojave të ndërtesave të shkatërruara për të inspektuar një impiant të trajtimit të ujërave të zeza në lagjen Sheikh Radwan, në veri të Gazës.
“Kam kaluar këtu rreth shtatë ose tetë muaj më parë, kur shumica e këtyre ndërtesave ishin ende në këmbë, dhe tani, kur sheh shkatërrimin, është e tmerrshme, një pjesë e madhe e qytetit është kthyer në shkretëtirë”, tha ai.
Qytetet e Gazës, me mbi dy milionë palestinezë, janë reduktuar në hi pas dy vitesh bombardimesh dhe luftime të ashpra mes Hamasit dhe ushtrisë izraelite.
Rreth një javë pasi presidenti amerikan Donald Trump ndërmjetësoi një armëpushim, pika kryesore kufitare me Egjiptin ende nuk është rihapur, por qindra kamionë hyjnë çdo ditë përmes pikave izraelite të kontrollit dhe ndihmat po shpërndahen.
Hamasi ka dorëzuar 20 pengjet e fundit që ishin gjallë dhe ka filluar t’i kthejë edhe trupat e 28 të tjerëve që kanë vdekur.
Duke vëzhguar pajisjet e dëmtuara të pompimit dhe një liqen me ujëra të ndotura në impiantin e Sheikh Radwanit, Fletcher tha se për OKB-në dhe agjencitë humanitare “puna që na pret është kolosale”.
Diplomati britanik tha se kishte takuar banorë që po ktheheshin në shtëpitë e tyre të rrënuara dhe po gërmonin latrina në mes të rrënojave.
“Ata më thanë se mbi të gjitha duan dinjitet”, shtoi ai. “Duhet të rikthejmë energjinë elektrike që të funksionojë sistemi i kanalizimeve” .“Kemi tashmë një plan 60-ditor për të shpërndarë ushqim, një milion vakte në ditë, për të rindërtuar sektorin e shëndetësisë, për të sjellë çadra për dimrin dhe për t’i kthyer qindra mijëra fëmijë në shkollë”.
Sipas të dhënave të ushtrisë izraelite, të shpërndara nga zyra humanitare e OKB-së, të enjten rreth 950 kamionë me ndihma dhe furnizime tregtare hynë në Gaza nga Izraeli.
Agjencitë e ndihmës kanë kërkuar që pika kufitare Rafah me Egjiptin të rihapet për të përshpejtuar hyrjen e ushqimeve, karburantit dhe barnave, ndërsa Turqia ka një ekip shpëtimtarësh në gatishmëri në kufi për të ndihmuar në kërkimin e trupave nën rrënoja.
Burimi: botasot.info
