Më 31 gusht u shënuan 28 vite nga ndarja nga jeta e Princeshës Diana, por kujtimi i saj vazhdon të jetojë në zemrat e miliona njerëzve anembanë botës. Ajo mbetet një nga figurat më të dashura të historisë moderne, ndaj nuk është çudi që edhe sot interneti mbushet shpesh me informacione rreth jetës së saj, një figurë që u quajt “princesha e popullit”.
Lajmi më i fundit që ka të bëjë me të ndërlidhet me zakonet e saj ushqimore, dhe konkretisht me atë që konsumonte thuajse çdo ditë për mëngjes.
Në një video të publikuar në YouTube, ish-shefi personal i kuzhinës së saj, Darren McGrady, ka zbuluar se mëngjesi i preferuar i Princeshës Diana ishin të ashtuquajturat overnight oats (bollgur i njomur gjatë natës).
Princesha Diana kishte zbuluar që para tre dekadash atë që sot konsiderohet një trend ushqimor i njohur.
Megjithatë, receta e McGrady ishte paksa ndryshe nga ajo që mund të prisni. Në fakt, bëhej fjalë për bircher muesli, një version i veçantë që Diana e kishte provuar gjatë një vizite në një klinikë në Zvicër.
Para se të largohej, kërkoi recetën dhe ia besoi shefit të saj personal, i cili nisi ta përgatiste për të çdo ditë. Përbërësi “sekret”? Lëngu i portokallit
Çfarë hante Princesha Diana për mëngjes?
Mijëra përdorues të rrjeteve sociale kanë nisur ta riprodhojnë recetën, e cila është njëkohësisht shumë e thjeshtë dhe mjaft e veçantë.
Në një tas shtoni 1 filxhan lëng portokalli të freskët dhe 1 filxhan me bollgur. Përziejeni, mbulojeni tasin dhe lëreni në frigorifer gjatë gjithë natës.
Në mëngjes, shtoni 1 filxhan kos, pak mjaltë dhe pak lëng limoni, një mollë të grirë, disa boronica dhe disa arra.
Në fund, vlen të përmendet se varieteti i preferuar i mollëve për Princeshën Diana ishte honeycrisp, një lloj molle e zhvilluar nga studiues në Qendrën Eksperimentale Bujqësore të Minesotës dhe që hyri në treg në fillim të viteve ’90.
Burimi: botasot.info
