Shtetet e Bashkuara miratuan të hënën shitjen e naftës iraniane deri në fund të muajit gusht, pas asaj që autoritetet amerikane e cilësuan si “bisedime produktive” të zhvilluara gjatë fundjavës në Zvicër mes delegacioneve të Uashingtonit dhe Teheranit.
Sekretari amerikan i Thesarit, Scott Bessent, njoftoi se në kuadër të një marrëveshjeje kornizë, Departamenti i Thesarit ka lëshuar një licencë të përgjithshme të përkohshme me afat 60-ditor, e cila lejon prodhimin, transportimin dhe shitjen e naftës iraniane.
Sipas Bessent, transaksionet e lejuara përfshijnë edhe importin në Shtetet e Bashkuara të naftës së papërpunuar, produkteve petrokimike dhe derivateve të naftës me origjinë iraniane. Megjithatë, licenca nuk lejon transaksione që lidhen me Korenë e Veriut apo Kubën.
Më herët gjatë ditës, zëvendëspresidenti amerikan JD Vance deklaroi se në bisedimet e zhvilluara në Zvicër ishte arritur “përparim i rëndësishëm”, pavarësisht njoftimit të Iranit gjatë fundjavës se kishte mbyllur Ngushticën e Hormuzit. Megjithatë, Komanda Qendrore e Forcave të Armatosura të SHBA-së (CENTCOM) sqaroi se Ngushtica e Hormuzit nuk ishte mbyllur. Vance bëri të ditur gjithashtu se Teherani kishte rënë dakord të lejonte rikthimin e inspektorëve të Agjencisë Ndërkombëtare të Energjisë Atomike (IAEA) në Iran.
Nga ana e tij, Bessent tha se qeveria iraniane është angazhuar të garantojë kalimin e lirë dhe të pandërprerë të anijeve përmes Ngushticës së Hormuzit.
Ndërkohë, Marina amerikane ka hequr bllokadën e vendosur ndaj porteve dhe zonave bregdetare iraniane, ndërsa supertankerët iranianë, të cilët gjatë luftës kishin çaktivizuar sistemet e tyre të gjurmimit, kanë riaktivizuar transmetuesit dhe kanë rifilluar transportin e ngarkesave të naftës nga rajoni.
Burimi: opinion.al
