Bisedimet mes Shteteve të Bashkuara dhe Iranit vijojnë, pavarësisht tensioneve të larta dhe operacioneve ushtarake të ndërmarra nga Uashingtoni, ka bërë të ditur zëdhënësja e Shtëpisë së Bardhë, Karoline Leavitt, shkruan Skynews, përcjell “Bota sot”.
Gjatë një deklarate për mediat, Leavitt u pyet se në çfarë faze ndodhen negociatat mes dy vendeve. Ajo tha se Irani vazhdon të komunikojë me SHBA-në dhe se Teherani kërkon një marrëveshje, pasi sipas saj po përballet me “goditje shkatërruese”.
“Arsyeja e sulmeve të fundit është sepse Irani ka shkelur Memorandumin e Mirëkuptimit që kishim arritur me ta”, deklaroi Leavitt.
Ajo akuzoi Teheranin se ka sulmuar anije tregtare në Ngushticën e Hormuzit, një prej korridoreve më të rëndësishme të transportit të energjisë në botë.
Megjithatë, zëdhënësja e Shtëpisë së Bardhë theksoi se presidenti amerikan mbetet i hapur për diplomaci.
“Presidenti është gjithmonë i gatshëm për diplomaci”, u shpreh Leavitt, duke lënë të hapur mundësinë e vazhdimit të negociatave, pavarësisht përshkallëzimit të situatës në terren.
Burimi: botasot.info
