Qeveria e Koresë së Jugut ka mbajtur një takim urgjent pas arrestimit të 475 personave, kryesisht shtetas koreano-jugorë, gjatë një bastisjeje të madhe nga autoritetet amerikane të imigracionit në një fabrikë të përbashkët të Hyundai dhe LG Energy Solution në Georgia, SHBA.
Ministri i Jashtëm koreano-jugor, Cho Hyun, deklaroi se ndiente “një ndjenjë të madhe përgjegjësie” për arrestimet dhe njoftoi ngritjen e një ekipi të posaçëm ndërinstitucional për të menaxhuar krizën.
Ai nuk përjashtoi mundësinë e një udhëtimi në Uashington për bisedime direkte me zyrtarët amerikanë.
LG Energy Solution, bashkë-operatore e fabrikës, deklaroi se po pezullon shumicën e udhëtimeve të biznesit drejt SHBA-së dhe se punonjësit me detyrë atje do të kthehen menjëherë në Korenë e Jugut.
Kompania tha gjithashtu se po punon për lirim të shpejtë të punonjësve të ndaluar, si dhe për t’u siguruar atyre medikamente dhe mbështetje mjekësore.
Presidenti amerikan Donald Trump mbrojti bastisjen duke deklaruar se “emigrantët e paligjshëm” ishin duke punuar në kundërshtim me ligjet amerikane.
“ICE thjesht po bënte punën e saj”, tha ai, duke nënvizuar se operacioni kishte për qëllim mbrojtjen e vendeve të punës në SHBA.
Top Channel
Burimi: top channel
