Fillimi i vitit të ri shkollor ka sjell në vëmendje të inspektoratit intensifikimin e masave ndaj shitjes së cigareve elektronike te të miturit, veçanërisht pranë shkollave.
Ministria e Industrisë, Ndërmarrësisë dhe Tregtisë, bën të ditur se Inspektorati Qendror i Mbikëqyrjes së Tregut po vazhdon aksionet e inspektimeve për parandalimin e shitjes së e-cigareve te të miturit, me vëmendjen nga hapësirat përreth institucioneve arsimore.
Sipas kwsaj ministrie, vetëm gjatë ditës së sotme ekipet përkatëse të IQMT-së kanë zhvilluar 18 inspektime në rajonet e Republikës së Kosovës, përkatësisht në Prishtinë, Prizren, Fushë Kosovë, Rahovec, Istog, Shtime dhe Podujevë.
Në kuadër të këtyre inspektimeve, inspektorët kanë urdhëruar largimin e menjëhershëm të cigareve elektronike nga shitja në dyqanet pranë shkollave.
Ndërsa, në rastet e deri më tanishme të mosrespektimit të dispozitave ligjore dhe urdhëresave të inspektorëve, janë shqiptuar tri gjoba dhe dy sekuestrime.
IQMT-ja do të vijojë edhe në ditët në vijim kontrollet në të gjitha regjionet e Kosovës, me fokus respektimin e dispozitave ligjore dhe mbrojtjen e të miturve.
Ministria e Industrisë, Ndërmarrësisë, Tregtisë dhe Inovacionit u ka bërë thirrje qytetarëve, veçanërisht prindërve, që të raportojnë çdo rast të shitjes së cigareve elektronike tek të miturit, veçanërisht pranë institucioneve arsimore, me qëllim krijimin e një mjedisi sa më të sigurt për fëmijët dhe nxënësit.
Burimi: botasot.info
