Suedia po përgatit një projektligj për të ulur moshën e përgjegjësisë penale nga 15 në 13 vjeç për krime shumë të rënda, si vrasja, tentativa e vrasjes, përdhunimi dhe veprat ku përdoren armë, në përpjekje për të frenuar rekrutimin e fëmijëve nga bandat kriminale.
Ministri i Drejtësisë, Gunnar Strömmer, deklaroi se vendi ndodhet në një “situatë emergjente”, duke theksuar se rrjetet kriminale po shfrytëzojnë në mënyrë të pamëshirshme fëmijë të mitur për të kryer akte dhune, pasi ata aktualisht nuk përballen me ndëshkime penale.
Sipas të dhënave zyrtare, numri i veprave penale të regjistruara ku të dyshuarit janë nën moshën 15 vjeç është dyfishuar gjatë dekadës së fundit.
Qeveria, e cila erdhi në pushtet në vitin 2022 me premtimin për të goditur krimin e organizuar, e sheh këtë ndryshim ligjor si një masë mbrojtëse si për fëmijët, ashtu edhe për viktimat e mundshme.
Projektligji parashikon që ulja e moshës të zbatohet vetëm në raste të jashtëzakonshme dhe nuk do të përbëjë një ulje të përgjithshme të përgjegjësisë penale. Në disa raste, fëmijët e përfshirë në krime të rënda mund të përballen edhe me dënime me burg.
Megjithatë, propozimi ka hasur kundërshtime të forta nga policia, prokurorët dhe administrata e burgjeve, të cilët paralajmërojnë se masa mund të çojë në përfshirjen e fëmijëve edhe më të vegjël në krim dhe se sistemi penal nuk është i përgatitur për trajtimin e të miturve kaq të rinj.
Kritikët argumentojnë se fëmijët duhet të trajtohen me kujdes dhe programe rehabilitimi, jo me ndëshkim penal, ndërsa disa e shohin nismën si të motivuar politikisht, në prag të zgjedhjeve të përgjithshme që do të mbahen në shtator.
Projektligji pritet t’i dërgohet Këshillit suedez për Legjislacionin për shqyrtim, përpara se të paraqitet për votim në parlament, dhe nëse miratohet, mund të hyjë në fuqi që këtë verë.
Top Channel
Burimi: top channel
