Pas humbjes 4-0 nga Paris Saint-Germain në gjysmëfinalen e Kupës së Botës për Klube,
Real Madridi është përballur me kritika për rënien në organizimin mbrojtës, sidomos pas rikthimit të Kylian Mbappes në formacion.
Pavarësisht formës së mirë gjatë muajve të fundit, skuadra u shkatërrua përballë presionit të PSG-së.
Trajneri Xabi Alonso, pas ndeshjes, foli për mungesën e përpjekjes kolektive në mbrojtje, pa përmendur drejtpërdrejt as Vinicius Juniorin dhe as Mbappen.
Problemet që Carlo Ancelotti kishte tentuar të zgjidhte më parë, janë kthyer sërish në vëmendje.
Sipas ‘Marca’, hierarkia e klubit është e vetëdijshme për çështjet e brendshme dhe ka siguruar Alonson se do ta mbështesë plotësisht në zgjidhjen e tyre, sidomos për menaxhimin e egove dhe disiplinës taktike.
Vëmendja kryesore është përqendruar te Vinicius Junior, forma e të cilit është në rënie, ndërsa rinovimi i kontratës ende nuk është finalizuar. Klubi dëshiron të kuptojë më qartë qëndrimin e tij dhe nivelin e përkushtimit.
Nga ana tjetër, Mbappe nuk ka bindur me angazhimin e tij pa top, duke sjellë shqetësim për trajnerin dhe stafin. Alonso e ka bërë të qartë se të gjithë lojtarët duhet të kontribuojnë në mbrojtje pa përjashtim.
Burimi: botasot.info
