Deputeti i VLEN-it, Bekim Qoku, ka reaguar ashpër ndaj Ali Ahmetit në një status të fundit në rrjetet sociale, duke e akuzuar për mosdënuar ndërhyrjet e Serbisë në veri të Kosovës dhe për mungesë idealeve kombëtare.
Qoku kujton fjalimin e Ahmetit në Prishtinë, ku sipas tij, “Kosovën e sotme e barazoi me atë nën Serbi e Jugosllavi, kur tha ‘trupi morrnica i shkonte kur ka qenë rrugës për në Prishtinë’”.
Ai shton: “Ali Ahmeti ka qenë pjesë e fushatës për t’u votuar Gjykata Speciale. Ai dëgjohet në ‘bombat’ e Zaevit kur bisedon me zyrtarë të PDK-së për dobinë e Gjykatës speciale dhe për Demarkacionin me Malin e Zi”.
Deputeti i VLEN-it kritikon edhe qëndrimin e Ahmetit ndaj ushtarëve të UÇK-së: “Partia e tij ka votuar 6 herë Ligjin e braniellave dhe kurrë nuk është marrë me statusin e ushtarëve të UÇK-së”.
Ai thekson edhe lidhjet e Ali Ahmetit me Serbinë: “Pa u mërzitur fare, ai, thjesht si kryetar i një partie politike, e priti dhe e shëtiti presidentin e Serbisë Vuçiq në kishën e Shën Naumit të Ohrit”.
Qoku përfundon me një kritikë të ashpër: “Atij nuk i ka mbetur më asnjë grimë ideali kombëtar apo njerëzor. Ky ka hallin që të kthehet në pushtet me çdo kusht dhe me çdo çmim”.
Burimi: alfax.mk
