Uashington – Presidenti amerikan Donald Trump ka njoftuar të hënën se Shtetet e Bashkuara do t’i dërgojnë Ukrainës armë të reja, ndërsa ka paralajmëruar se, nëse brenda 50 ditësh nuk arrihet një marrëveshje paqeje, do të vendosen tarifa ndëshkuese ndaj aleatëve ekonomikë të Rusisë.
Ky qëndrim përfaqëson një linjë dukshëm më të ashpër të administratës Trump ndaj Kremlinit.
“Tarifa shumë të ashpra” dhe zhgënjim ndaj Putinit
Gjatë një takimi në Zyrën Ovale me Sekretarin e Përgjithshëm të NATO-s, Mark Rutte, presidenti amerikan deklaroi se bëhet fjalë për “tarifa dytësore” që do të synojnë partnerët tregtarë të Rusisë, me synimin për ta izoluar Moskën në ekonominë globale.
“Unë e përdor tregtinë për shumë qëllime,” tha Trump. “Por është mjet i shkëlqyer për t’i dhënë fund luftërave.”
Ai shfaqi hapur zhgënjimin ndaj presidentit rus: “M’u duk se kemi arritur marrëveshje katër herë. Kam dëgjuar shumë premtime. Vetëm fjalë… dhe pastaj bien raketa në Kiev dhe vriten 60 vetë”, tha Trump.
Më herët, në prill, ai i kishte kërkuar Putinit të ndalonte bombardimet në Kiev, ndërsa në maj e kishte quajtur publikisht “tërësisht të çmendur” për vazhdimin e sulmeve. “Edhe mua më mashtroi,” pranoi Trump.
Ukraina pritet të marrë armë në sasi masive
Sipas Rutte, marrëveshja me SHBA-në do t’i mundësojë Ukrainës qasje në “sasi vërtet masive të pajisjeve ushtarake”. Armët amerikane do të paguhen nga vende evropiane si Gjermania, Finlanda, Kanadaja, Norvegjia, Suedia, Mbretëria e Bashkuar dhe Danimarka, ndërsa SHBA nuk do të shpenzojë fonde shtesë për këtë qëllim.
Trump i cilësoi këto dërgesa si “një marrëveshje biznesi”, duke lënë të kuptohet se ndihma ushtarake vjen pa barrë financiare për SHBA-në. Kështu, ai synon të qetësojë krahun e djathtë konservator të elektoratit të tij, i cili ka kërkuar vazhdimisht ndërprerjen e ndihmës për Ukrainën.
“Ky është një luftë e Bidenit, një luftë e demokratëve,” u shpreh Trump, duke theksuar se ai nuk dëshiron të mbahet përgjegjës për këtë konflikt. “E kam thënë edhe më parë: kjo nuk është lufta e Trumpit.”
Diplomacia transatlantike në lëvizje
Sekretari i Përgjithshëm i NATO-s, Mark Rutte, do të zhvillojë bisedime edhe gjatë ditës së nesërme në Uashington me presidentin Trump, sekretarin e Shtetit Marco Rubio dhe ministrin e Mbrojtjes Pete Hegseth, si dhe me anëtarë të Kongresit amerikan.
Në kryeqytetin amerikan ndodhet aktualisht edhe ministri gjerman i Mbrojtjes, Boris Pistorius, i cili do të diskutojë me homologun e tij amerikan mbi ndihmën ushtarake për Ukrainën.
Burimi: botasot.info
