Presidenti i Ukrainës, Volodymyr Zelensky, e ka cilësuar si të dobët reagimin e homologut të tij rus, Vladimir Putin, ndaj letrës së hapur me të cilën kërkoi zhvillimin e bisedimeve të drejtpërdrejta mes dy liderëve.
Në një video-mesazh të publikuar në platformën X, Zelensky akuzoi Rusinë se po zgjedh sërish rrugën e luftës në vend të dialogut
“Fatkeqësisht, pala ruse zgjodhi sërish luftën. Të gjithë e dëgjuan përgjigjen sot. Ishte një përgjigje e dobët”, u shpreh presidenti ukrainas.
Zelensky tha se Putin nuk po tregon vullnet për t’i dhënë fund konfliktit dhe shtoi se reagimi i Kremlinit ka zhgënjyer shumë njerëz në mbarë botën.
Komentet e tij erdhën pasi presidenti rus deklaroi gjatë Forumit Ekonomik Ndërkombëtar të Shën Petersburgut se aktualisht nuk sheh arsye për t’u takuar me Zelenskyn.
Putin kritikoi përmbajtjen e letrës së hapur të presidentit ukrainas, duke thënë se ajo përmbante “elemente vrazhdësie” dhe se një qasje e tillë nuk krijon kushtet e nevojshme për negociata personale.
“A është kjo një mënyrë për të krijuar kushte për takime dhe negociata personale apo po krijon një mjedis ku takimet personale bëhen të pamundura? Unë mendoj se është kjo e fundit”, deklaroi Putin.
Burimi: opinion.al
