Nis marshimi i qytetarëve drejt Kryeministrisë, duke shënuar kështu protestën e 130-të kundër qeverisë.
Protestuesit u mblodhën fillimisht në sheshin “Skënderbej” dhe më pas nisën marshimin në drejtim të bulevardit “Dëshmorët e Kombit” dhe godinës së Kryeministrisë.
Kërkesa kryesore e tyre mbetet dorëheqja e kryeministrit Edi Rama dhe largimi i qeverisë aktuale. Gjatë protestave të zhvilluara prej disa muajsh është artikuluar gjithashtu kërkesa për krijimin e një qeverie teknike tranzitore.
Ndërkohë, protesta e sotme i paraprin një tjetër tubimi të paralajmëruar për ditën e nesërme, 8 tetor, këtë herë përpara Kuvendit.
Në të njëjtën ditë, Kuvendi pritet të shqyrtojë dhe votojë projektligjin për reformën administrativo-territoriale. Drafti parashikon shkrirjen e 15 bashkive dhe bashkimin e tyre me njësi vendore më të mëdha, duke e ulur numrin e bashkive nga 61 në 46.
Ndryshimet janë kundërshtuar nga opozita dhe përfaqësues të disa prej komuniteteve që preken nga harta e re. Kundërshtarët e reformës kanë ngritur shqetësime për pasojat që, sipas tyre, ndryshimet mund të sjellin për përfaqësimin dhe zhvillimin e zonave që humbasin statusin e bashkisë.
Për këtë arsye, përpara Kuvendit është paralajmëruar një protestë kombëtare në ditën kur reforma pritet të kalojë për votim.
Burimi: botasot.info
