Princi William: Burrat të flasin hapur për shëndetin mendor, krizat kalojnë

Nevojiten më shumë modele meshkujsh për të folur publikisht për shëndetin e tyre mendor në mënyrë që të ndihmojnë burrat e tjerë, ka deklaruar princi i Uellsit, William, në një bisedë të sinqertë rreth shëndetit mendor, ku zbuloi se i duhet kohë për të kuptuar emocionet e tij.

Ai deklaroi se “një krizë e shëndetit mendor është e përkohshme, por do të kalojë.”

“Kam kohë që përpiqem të kuptoj emocionet e mia dhe pse ndihem ashtu siç ndihem. Mendoj se është një proces vërtet i rëndësishëm për t’u kaluar herë pas here, për të kontrolluar veten dhe për të kuptuar pse ndihesh ashtu siç ndihesh. Ndonjëherë ka një shpjegim, ndonjëherë jo. Një krizë e shëndetit mendor është e përkohshme, por do të kalojë”, tha ai në një episod të veçantë të “Life Hacks” në BBC Radio.

Princi William i inkurajoi njerëzit të mësojnë të duan dhe vlerësojnë veten. Ai tha gjithashtu se është e rëndësishme të ndani ndjenjat tuaja.

“Ne kemi nevojë për më shumë modele meshkujsh për të folur për këtë dhe për ta normalizuar atë. Mbështetja e organizatave që punojnë në këtë fushë mund të jetë një trampolinë e vogël për t’ju ndihmuar të kaloni një kohë të vështirë. Mund të zgjoheni nesër dhe të ndiheni shumë ndryshe“, tha ai.

Duke marrë pjesë në një diskutim në panel rreth vetëvrasjes mashkullore me prezantuesin Greg James, ai tha se kjo do të ndihmonte që diskutimet e hapura “të bëheshin natyrë e dytë për të gjithë ne” dhe reflektoi mbi strategjitë e tij për përpunimin e emocioneve.

Fondacioni Princ William investoi një milion dollarë në zhvillimin e Rrjetit Kombëtar të Parandalimit të Vetëvrasjeve.