Presidentja e Moldavisë: 5 dronë rusë shkelën hapësirën ajrore dhe shpërthyen në territorin tonë

Presidentja e Moldavisë tha të shtunën se pesë armë ajrore ruse, përfshirë raketa Banderol dhe dronë, kishin shkelur hapësirën ajrore të vendit dhe kishin shpërthyer në territorin e saj.

Maia Sandu paralajmëroi se sulmet e Rusisë ndaj Ukrainës fqinje “po arrijnë në mënyrë të rrezikshme në Moldavi”.

“Moska po vë në rrezik jetë njerëzish në të gjithë Evropën dhe duhet të ndalet”, shkroi ajo në X.

Më vete, Ministria e Jashtme e Moldavisë “dënoi me forcë” atë që e quajti shkelje të hapësirës ajrore të vendit, duke theksuar se fragmente të dronit u gjetën jashtë Causenit, pranë fshatit Dubovca, midis lokaliteteve Delacau dhe Puhaceni, dhe pranë Crocmaz, ku incidenti shkaktoi një zjarr në bimësi dhe dëme materiale.

“Lufta e Rusisë kundër Ukrainës vazhdon të paraqesë kërcënime konkrete për vendin tonë dhe për sigurinë e të gjithë rajonit”, tha ajo.

Të enjten, ministria thirri ambasadorin rus në Kishinau për t’i dorëzuar një notë proteste pasi tre dronë shkelën hapësirën ajrore të Moldavisë brenda një dite të vetme.

Ministria tha se dy nga dronët u rrëzuan dhe shpërthyen në territorin e vendit, duke theksuar se gjatë shtatë ditëve të fundit, hapësira ajrore e vendit është shkelur tetë herë.

Ambasadori rus në Moldavi, Oleg Ozerov, akuzoi Kishinaun se po i shpërfill propozimet e Moskës për të hetuar së bashku incidentet që përfshijnë rrëzimin e dronëve në territorin e Moldavisë.

“Jemi të ngopur me akuza të pabazuara”,  tha ai, pasi vizitoi Ministrinë e Jashtme moldave.

Në muajt e fundit, një numër gjithnjë e në rritje i vendeve evropiane kanë protestuar kundër ndërhyrjeve të dyshuara nga dronë rusë në hapësirën e tyre ajrore, pretendime të mohuara nga Moska.