​Prangoset 29-vjeçari i dënuar për dhunë familjare në Kurbin

Shërbimet e Komisariatit të Policisë Kurbin, pas marrjes së njoftimit për një rast dhune në familje në Laç, menjëherë shkuan në adresën e dhënë dhe nisën veprimet e para hetimore.

Nga veprimet e para hetimore rezultoi se shtetasi R. Gj. (29), kishte ushtruar dhunë fizike ndaj babait të tij, K. Gj. (66), dhe ishte larguar nga banesa, raporton KosovaPress.

Shërbimet e Komisariatit të Policisë Kurbin, në bashkëpunim me Forcat Kombëtare të Sigurisë, Njësia Tiranë, pas disa orësh kërkimesh të pandërprera, lokalizuan, kapën dhe vunë në pranga shtetasin R. Gj., banues në Laç, Kurbin, i dënuar më parë për dhunë në familje.

Gjatë kontrollit në banesën ku ky shtetas fshihej, në Zejmen, Lezhë, shërbimet e Policisë gjetën dhe sekuestruan në cilësinë e provës materiale një sasi lënde narkotike, të dyshuar kanabis, rreth 105 gramë.

Materialet procedurale iu referuan Prokurorisë Lezhë, për veprime të mëtejshme.