Axhenda pro-kripto e administratës Trump rrezikon të mbjellë farën e një krize financiare sipas Guvernatorit të Bankës së Francës i cili shërben edhe si anëtar i Këshillit Drejtues të Bankës Qendrore Europiane.
Villeroy de Galhau argumentonte se duke inkurajuar asetet kripto dhe një financë jashtë bankave, administrata Trump “po mbjell farat e trazirave të ardhshme”, duke shtuar se krizat financiare “shpesh kanë origjinën në Shtetet e Bashkuara dhe përhapen në pjesën tjetër të botës”.
Menjëherë pasi presidenti Amerikan Trump mori drejtimin e Shtëpisë së Bardhë ka vepruar për të përmbushur premtimet e bëra ndaj industrisë kripto përpara zgjedhjeve, mes tyre edhe krijimin e një rezerve strategjike Bitcoin në atë që Trump e quan si lidershipi Amerikan në asetet dixhitale.
Por qëndrimi i tij pro-kripto nuk ka shtyrë më tutje tregjet kripto ku Bitcoin së bashku me aksionet Amerikane u goditën rëndë nga axhenda ekonomike e Trump. Menjëherë pasi vendosi të aplikojë tarifa 200 përqind për importet Europiane, S&P 500 ra me 10 përqind nga rekordi i muajit Shkurt.
Asokohe Bitcoin ra në 81,600 dollarë, një tkurrje prej 25 përqind krahasuar me rekordin prej 109 mijë dollarësh vendosur në Janar. Tregjet kripto panë likuidime mbi 1 miliardë dollarë. /PCWorld Albanian
BURIMI: PCWORLD.AL
