Pogradeci fitoi për herë të parë në historinë e tij Kupën e Shqipërisë në volejboll për femra.
Në finalen e luajtur të premten në mbrëmje në sallën sportive në Farkë, skuadra e trajnerit Lisha fitoi 3-2 ndaj Tiranës (18-25, 25-18, 25-22, 17-25, 15-11).
Një ndeshje maratonë, që zgjati mbi dy orë dhe ku të dyja ekipet dueluan fort për fitoren. Gjithcka u vendos në setin final, që gjithashtu ishte mjaft i dueluar.
Edhe pse bardheblutë udhëhiqnin në pikën e tetë, liqenoret rikuperojnë e triumfojnë me meritë.
Loja e të dyja skuadrave ka luhatje hera-herës, pasi herë udhëheq Tirana e herë Pogradeci. Bardheblutë bëjnë rezistencë të mirë, por gabojnë në momentet vendimtare të setit final. Aty Pogradeci shkëputet dhe fiton, duke nisur festën.
Ky është suksesi i dytë për skuadrën pogradecare në këtë sezon brenda pak ditësh, pas triumfit në Ligën “Gjergj Kastrioti“. Tani për liqenoret vjen një tjetër triumf i madh, ndërkohë që kryeson edhe Supërligën shqiptare, ku pritet mjaft rivalitet.
Burimi: botasot.info
