Përmbytjet në Nepal kanë shkaktuar të paktën 579 viktima dhe kanë lënë pas një situatë të rëndë humanitare, ndërsa ekipet e shpëtimit vijojnë kërkimet për personat e zhdukur. Në përgjigje të katastrofës, Kanadaja dhe Britania e Madhe kanë njoftuar paketa të reja ndihme për autoritetet dhe të prekurit.
Qeveria kanadeze do të akordojë 5 milionë dollarë kanadezë, rreth 3.1 milionë euro, për operacionet e kërkim-shpëtimit dhe ndihmën humanitare në Nepal.
“Kanadaja do të ofrojë 5 milionë dollarë ndihmë humanitare për të mbështetur përpjekjet e punonjësve të shpëtimit në Nepal”, u shpreh Randeep Sarai, zëvendësministër i zhvillimit ndërkombëtar të Kanadasë.
Ndërkohë, Britania e Madhe ka vendosur të dërgojë në Nepal një Ekip të Vendosjes së Shpejtë, i cili do të mbështesë shtetasit britanikë dhe familjet e tyre të prekura nga përmbytjet.
Ekipi pritet të mbërrijë në Katmandu të shtunën dhe do të punojë së bashku me ambasadën britanike dhe autoritetet lokale për të ofruar ndihmë konsullore dhe për të koordinuar reagimin ndaj situatës.
Sekretari i Jashtëm britanik, Ed Miliband, ka bërë me dije se siguria dhe mirëqenia e shtetasve britanikë janë në qendër të ndërhyrjes së qeverisë.
“Mendimet tona janë me të gjithë ata që janë prekur”, u shpreh Miliband, duke shtuar se stafi britanik po bashkëpunon me autoritetet nepaleze, ekipet e emergjencave dhe ambasadën në Katmandu për t’u siguruar të prekurve ndihma dhe informacioni i nevojshëm.
Mbështetja britanike është pjesë e një pakete prej 5 milionë paundësh për ndihmën humanitare dhe rimëkëmbjen pas fatkeqësisë. Fondet do të përdoren për të ndihmuar autoritetet nepaleze, organizatat e Kombeve të Bashkuara, Kryqin e Kuq dhe organizata të tjera joqeveritare.
Situata mbetet veçanërisht e rëndë për shtetasit britanikë. Më shumë se 30 prej tyre raportohet se janë mes viktimave të dyshuara, ndërsa ekipet e shpëtimit vijojnë kërkimet për dhjetëra persona të tjerë që rezultojnë të zhdukur.
Operacionet janë përqendruar veçanërisht në rajonin Raswa, pranë kufirit me Rajonin Autonom të Tibetit në Kinë. Terreni i dëmtuar dhe rreziku për përmbytje të tjera po vështirësojnë punën e ekipeve të shpëtimit.
Autoritetet nepaleze vijojnë kërkimet për personat e zhdukur, ndërsa paralajmërimet për reshje dhe përmbytje të reja mbajnë në rrezik banorët dhe ekipet që po punojnë në zonat e prekura.
Burimi: botasot.info
