Të paktën 13 persona kanë vdekur në kryeqytetin e Ganës, Accra, pasi shirat e rrëmbyeshëm shkaktuan përmbytje të mëdha, sipas shërbimit të zjarrfikësve që është përfshirë në përpjekjet e shpëtimit.

Qeveria u ka bërë thirrje njerëzve të qëndrojnë brenda ose të zhvendosen në vende më të larta, pasi agjencia meteorologjike paralajmëroi se priten shira të mëtejshëm me një stuhi të madhe që po afrohet nga lindja.

Pjesa më e madhe e ujit nga reshjet e rrëmbyeshme të së dielës në mbrëmje ka filluar të tërhiqet, por ndërsa operacioni i rimëkëmbjes vazhdon, Shërbimi Kombëtar i Zjarrfikësve të Ganës (GNF) tha se numri i të vdekurve mund të rritet, shkruan BBC.

Zonat e ulëta u prekën veçanërisht. Videot që qarkullojnë në mediat sociale tregojnë shtëpi dhe automjete të zhytura, ndërsa shumë ndërtesa janë shkatërruar.

Ekipet e reagimit ndaj emergjencave janë vendosur në rajonin e prekur nga përmbytjet, përfshirë policinë, shërbimin zjarrfikës, ushtrinë dhe Organizatën Kombëtare të Menaxhimit të Fatkeqësive.

Ministria e Brendshme tha se ata ishin vendosur për të monitoruar situatën dhe për të mbrojtur jetët dhe pronën.

GNFS tha se kishte shpëtuar më shumë se 470 njerëz deri më tani.

Përmbytjet shkaktuan gjithashtu një zjarr të madh në një fabrikë gome në qytet.

Burimi: botasot.info