Qytetarët në Fushë Kosovë po ankohen se nga bllokimi i trotuareve nga veturat, po detyrohen të rrezikojnë që të ecin në asfalt. Nga opozita në Fushë Kosovë thonë se kjo po ndodh si rezultat i keqplanifikimit, ndërsa akuzojnë qeverisjen komunale për mosgjetje të zgjidhjes. Komuna thotë se janë duke punuar në dy drejtime në zgjidhjen e gjithë kësaj.
Si shkak i veturave të parkuara në trotuar, qytetarët po detyrohen që të ecin në asfalt. Një tjetër qytetarë thotë se kjo po ndodh edhe për shkak se Fushë Kosova është bërë qytet i mbingarkuar.
Nga opozita në Fushë Kosovë, thonë se kjo po ndodh si rezultat i keqplanifikimit, ndërsa akuzojnë qeverisjen komunale për mosgjetje të zgjidhjes.
“Si rezultat i keqplanifikimit edhe në aspektin urban. Qytetarët e Kosovës si këmbësorët, ashtu edhe vozitësit përballën me kaos në pjesën e lëvizshmërisë në pjesën e qytetit, Pra për çdo ditë, si pasojë e mungesës së parkingjeve, kemi bllokim të trotuareve, gjë që i rrezikon edhe qytetarët gjatë lëvizjes”, tha për RTK-në Durim Hajra, shef i asamblistëve të VV-së në Fushë Kosovë.
“Në komunën tonë dominon kaosi me keqmenaxhim dhe keqpërdorim të hapësirës publike. Inspektorati nuk e kryen punën e vetë, kryetari nuk e kryen punën e vetë, kjo ndikon që siguria publike rrezikohet”, tha Rrahim Tërrnava, kryetar i degës së PDK-së në Fushë Kosovë.
Por, ndryshe thonë nga Komuna e Fushë Kosovës. Sipas nënkryetarit, lidhur me këtë, janë duke punuar në dy drejtime.
“Kemi miratuar planin e mobilitetit që ka të bëjë me rregullimin e komunikacionit e dyta, veprimi që jemi duke marrë në baza mujore, me i lirua sa më shumë trotuaret dhe hapësirat”, tha Besnik Osmani, nënkryetar i Fushë Kosovës.
Osmani tha se kanë bërë një plan konkret, veçmas për rrugën Dardania, ku pritet të lirohen një pjesë e hapësirave publike nga tarracat e përkohshme dhe vendosjet e tjera mobile që kanë qenë në këto rrugë dhe sipas tij pritet të ketë edhe pengesa për të penguar parkimin e veturave në trotuare.
Burimi: botasot.info
