Papa kundër eutanazisë gjatë vizitës në Francë: Mund të jetë e ligjshme, por jo morale

Gjatë një vizite historike në vendin e njohur të pelegrinazhit në Lourdes, në Francë Papa Leoni i 14-të ka dënuar legalizimin e vdekjes së asistuar, apo eutanazisë.

Ai e cilësoi këtë praktikë si një akt të “dhembshurisë së rreme” dhe deklaroi se shkaktimi i vdekjes nuk mund të konsiderohet kurrë si diçka normale.

Komentet Ati i Shenjtë i bëri përpara 150,000 besimtarëve, mes të cilëve shumë të sëmurë dhe persona me aftësi të kufizuara. Papa shfrytëzoi këtë ndalesë në ditën e tretë të udhëtimit të tij në Francë për të adresuar direkt ndryshimet e fundit ligjore në vend.

“Asnjë ligj njerëzor nuk duhet t’ju bëjë kurrë të humbni sigurinë e dinjitetit tuaj. Ajo që është e ligjshme nuk është domosdoshmërisht morale.”u shpreh papa Leoni. Deklarata e kreut të Kishës Katolike vjen si një reagim i drejtpërdrejtë ndaj ligjit të ri të miratuar nga Parlamenti i Francës.

Pas vitesh debatesh të ashpra etike dhe politike, legjislacioni francez u dha të drejtën e vdekjes së asistuar të rriturve që vuajnë nga sëmundje të pashërueshme dhe në faza terminale. Kisha Katolike në Francë e ka kundërshtuar projektligjin që në fillesat e tij. Sipas ligjit të ri, pacientët që plotësojnë kriteret strikte mjekësore duhet ta administrojnë vetë substancën vdekjeprurëse, përveç rasteve kur janë fizikisht të paaftë.

Vatikani mban një qëndrim të prerë kundër eutanazisë duke predikuar se jeta njerëzore duhet të mbrohet që nga ngjizja e deri në vdekjen natyrale.

Gjatë kësaj vizite katërditore, Papa ka kritikuar gjithashtu prirjet shoqërore që e kthejnë shkencën dhe mjekësinë në industri fitimi, duke përfshirë këtu manipulimet gjenetike dhe surrogacinë. Ky udhëtim shënoi vizitën e parë zyrtare papale në Francë në gati dy dekada.