​Ozempic redukton 9000 vende pune

Prodhuesi i Wegovy dhe Ozempic, Novo Nordisk, do të shkurtojë 9000 vende pune vetëm disa javë pas paralajmërimit se fitimet do të bien.

Këto reduktime përbëjnë 11% të fuqisë punëtore të kompanisë daneze dhe shënojnë hapin e parë të madh nga drejtori i ri ekzekutiv Mike Doustdar, ndërsa Novo Nordisk përballet me presionet në rritje në sektorin në shpejt rritje të barnave për humbjen e peshës.

Kërkesa për barnat për humbjen e peshës është rritur në vitet e fundit, veçanërisht pas bllokimeve të Covid që detyruan njerëzit të qëndronin në shtëpi.

“Tregjet tona po evoluojnë, veçanërisht në obezitet, pasi është bërë më konkurruese dhe e drejtuar nga konsumatori. Kompania jonë duhet të evoluojë gjithashtu”, tha Doustdar, raporton BBC, përcjell KosovaPress.

Novo Nordisk ka përballuar konkurrencë të shtuar nga rivalë si Eli Lilly, që prodhon Mounjaro.

Së fundmi, Eli Lilly rriti çmimin e Mounjaro në Britani, gjë që çoi disa pacientë të paralajmëronin se nuk po mund ta gjenin ilaçin, pasi farmacitë po i grumbullonin në stok përpara se rritja të hynte në fuqi. Kompania njoftoi se çmimi i Mounjaro do të rritet deri në 170%, që do të thotë se një furnizim mujor i dozës më të lartë do të shkojë nga 122 në 330 funte.

Megjithatë, Eli Lilly ofroi një marrëveshje me zbritje për furnizuesit britanikë, e cila pritet të kufizojë rritjen e çmimit për konsumatorët nga shtatori.

Eli Lilly fillimisht tha se çmimi i Mounjaro në Britani duhej të rritej për t’u përputhur më mirë me çmimet më të larta në Evropë dhe SHBA. Në Novo Nordisk, kompania paralajmëroi në korrik se shitjet dhe fitimet e saj vjetore nuk do të rriten aq shpejt sa pritej. Kompania synon të ulë kostot me 8 miliardë korona daneze deri në fund të vitit të ardhshëm.

Kompania do të fillojë diskutimet me punonjësit në muajt e ardhshëm, në përputhje me ligjet lokale të punës. Ajo do të ndajë më shumë detaje kur të raportojë rezultatet financiare më 5 nëntor.