Prej javësh, interneti është pushtuar nga thashethemet për atë që shumë media e kanë quajtur “dasma e shekullit” mes Taylor Swift dhe Travis Kelce. Sipas raportimeve të fundit, ceremonia pritet të jetë një event luksoz me kod veshjeje black tie, ku të ftuarit do të duhet të respektojnë një etikë strikte në veshje.
Për meshkujt kjo nënkupton smoking klasik me papion të zi, ndërsa gratë pritet të zgjedhin fustane të gjata ose veshje elegante mbrëmjeje.
Megjithatë, shumë nga detajet që po qarkullojnë mbeten të pakonfirmuara. Raportime të ndryshme pretendojnë se çifti ka marrë masa të pazakonta për të ruajtur privatësinë e ceremonisë, duke mos u treguar të ftuarve vendndodhjen dhe orarin e saktë deri në momentet e fundit. Sipas këtyre zërave, disa të ftuar nuk janë aspak të lumtur me nivelin e lartë të sekretit, pasi u është kërkuar të rezervojnë disa ditë pa marrë informacion të plotë.
Në të njëjtën kohë, mediat rozë kanë ndezur debat edhe për një tjetër pretendim: mundësinë që Taylor Swift të performojë në festën e saj të dasmës. Disa e konsiderojnë këtë një ide spektakolare për të ftuarit, ndërsa të tjerë mendojnë se një performancë e tillë do ta kthente ceremoninë në një koncert, në vend të një feste private.
Pavarësisht gjithë zhurmës, as Taylor Swift dhe as Travis Kelce nuk kanë konfirmuar publikisht datën, vendin apo detajet e dasmës së tyre. Për momentin, pjesa më e madhe e informacionit që po qarkullon mbështetet në burime anonime dhe raportime të mediave rozë, ndaj mbetet për t’u parë se sa prej tyre do të rezultojnë të vërteta.
Burimi: botasot.info
