Një burrë që luftoi për Rusinë në Ukrainë arrestohet në Bosnje nën dyshimin për drogë dhe armë

Danijell Grubaç nga Knezheva – të cilin Radio Evropa e Lirë e identifikoi kohë më parë si ndër njerëzit që luftuan në anën e Rusisë në Ukrainë – u arrestua më 21 korrik në Knezhevë pranë Banjallukës, nën dyshimin për vepra të shumta penale, ka mësuar Shërbimi i Ballkanit i REL-it.

Ministria e Punëve të Brendshme e Republikës Sërpska, entitetit serb të Bosnjës, e identifikoi Grubaçin vetëm me inicialet D.G., në një deklaratë më 22 korrik.

Sipas Ministrisë, ai dyshohet për rrezikim të sigurisë, prodhim dhe trafikim të paautorizuar të narkotikëve, si dhe prodhim dhe trafikim të paautorizuar të armëve ose eksplozivëve.

Policia e kapi atë pasi ishte njoftuar se ai e kishte kërcënuar me armë zjarri një person në Knezhevë.

Siç ka mësuar REL-i jozyrtarisht, ai u raportua në polici nga xhaxhai i tij, i cili deklaroi se Grubaç e kishte kërcënuar dhe se ndihej i kërcënuar nga ai.

Ministria njoftoi gjeti një pushkë automatike, një pistoletë, 182 fishekë, 177 kërcej të dyshuar si kanabis indian, si dhe tokë të përgatitur për kultivim të mëtejshëm të bimës, gjatë një bastisje në shtëpinë e Grubaçit.

Tre shtetas serbë u arrestuan bashkë me të nën dyshimin për prodhim dhe trafikim të paautorizuar të narkotikëve.

Ndërkohë, vitin e kaluar, REL-i raportoi se Danijell Grubaç ishte në mesin e rreth 20 personave me origjinë boshnjake që luftuan ose po luftonin në radhët e ushtrisë ruse në luftën kundër Ukrainës.

Sipas të dhënave zyrtare nga projekti ukrainas “Dua të jetoj”, Grubaç, 33 vjeç, ishte i listuar si rreshter i ri në radhët e Forcave të Armatosura Ruse.

Grubaç, siç ka mësuar jozyrtarisht REL-i, qëndron shpesh në Serbi, nga ku thuhet se udhëtoi për në Rusi dhe në zonat e shkatërruara nga lufta të Ukrainës.

REL-i i ka dërguar pyetje Zyrës së Prokurorit Publik të Qarkut në Banjallukë dhe Zyrës së Prokurorit të Bosnjës në lidhje me statusin e çdo procedure penale kundër Grubaçit.

Prokuroria e Bosnjës më parë nuk ishte në gjendje të ndante më shumë informacion në lidhje me Grubaçin, por REL-i kishte informacione jozyrtare nga burime të inteligjencës në Bosnjë se ai ishte bashkuar me ushtrinë ruse.