Ngritja e Këshillit të Paqes, Polonia dhe Italia njoftojnë se nuk do të marrin pjesë! Tajani: Na kufizon Kushtetuta e vendit

Polonia dhe Italia njoftuan se nuk do të marrin pjesë në Këshillin e Paqes të presidentit amerikan Donald Trump.

“Duke marrë parasysh disa dyshime kombëtare lidhur me formën e këshillit, në këto kushte Polonia nuk do të marrë pjesë në punën e Këshillit të Paqes, por do ta analizojmë atë”, deklaroi kryeministri Donald Tusk gjatë një mbledhjeje qeveritare.

“Marrëdhëniet tona me SHBA-në kanë qenë dhe do të mbeten prioriteti ynë. Prandaj, nëse kushtet ndryshojnë dhe bëjnë të mundur pjesëmarrjen në punën e Këshillit të Paqes, nuk e përjashtojmë një skenar të tillë”, shtoi ai.

Tusk pritej të takohej më vonë gjatë ditës me rivalin e tij nacionalist, Karol Nawrocki, në një mbledhje të Këshillit Kombëtar të Sigurisë, në rendin e ditës të së cilës përfshihet edhe çështja e Këshillit të Paqes.

Ndërkohë, ministri i Jashtëm i Italisë, Antonio Tajani, konfirmoi sot se edhe Italia nuk do të marrë pjesë.

“Nuk mund të marrim pjesë në Këshillin e Paqes, sepse ekziston një pengesë e pakapërcyeshme kushtetuese nga ana italiane”, deklaroi ai për kanalin informativ Sky TG24.

“Megjithatë, nëse do të jetë e nevojshme të punojmë në përpjekjet për rindërtim me qëllim garantimin e paqes në Lindjen e Mesme, ne jemi të gatshëm ta bëjmë këtë”, shtoi ai.

Çfarë parashikon Kushtetuta italiane

Sipas Kushtetutës italiane, vendi mund të bashkohet me organizata ndërkombëtare vetëm mbi bazën e barazisë me anëtarët e tjerë, një kusht që, sipas Romës, nuk përmbushet nga statuti aktual i Këshillit, i cili i jep kompetenca të zgjeruara ekzekutive Donald Trump-it.

Kryeministrja italiane, Giorgia Meloni, deklaroi muajin e kaluar se i kishte kërkuar Trump-it të ndryshojë kushtet e Këshillit të Paqes, në mënyrë që Italia të mund të bëhet pjesë e tij.