Në sheshin “Skënderbeu” aktgjykimi do të përcillet në ekran të madh

Ata të cilët ju kundërvunë regjimit të Millosheviqit dhe parandaluan edhe masakra të tjera që kishte planifikuar Serbia, po presin verdiktin e Gjykatës Speciale. Ndërkohë, Prishtina po hyn në ditët e fundit të pritjes para 16 shtatorit, datës kur Gjykata Speciale në Hagë do ta shpallë aktgjykimin ndaj Hashim Thaçit, Kadri Veselit, Jakup Krasniqit dhe Rexhep Selimit. Në kryeqytet tashmë kanë nisur përgatitjet për këtë ditë, ndërsa në sheshe dhe hapësira publike janë vendosur flamujt dhe simbolet e UÇK-së. Komuna e Prishtinës ka paralajmëruar që seanca të përcillet drejtpërdrejt në ambient të hapur, në sheshin “Skënderbeu”.

Prishtina po merr pamje të veçantë në prag të 16 shtatorit. Flamujt e UÇK-së dhe simbolet e saj janë vendosur në hapësira të ndryshme të kryeqytetit, ndërsa në qendër të qytetit kanë nisur përgatitjet për aktivitetet që do të zhvillohen në ditën kur pritet të shpallet aktgjykimi për krerët e UÇK-së.

Çdo numër që zbret në këtë ekran na ofron me momentin e shumëpritur, vendimin e 16 shtatorit në Dhomat e Specializuara të Kosovës në Hagë. Nga zemra e Prishtinës e deri te salla e gjyqit në Hagë të gjithë janë në pritje të një momenti, vendimit ndaj Hashim Thaçit, Kadri Veselit, Jakup Krasniqit dhe Rexhep Selimit. Ndërkohë që në Prishtinë tashmë kanë nisur përgatitjet për kthimin e mundshëm të ish katër krerëve të UÇK-së.

Pikërisht për momentin e shpalljes së aktgjykimit, Komuna e Prishtinës ka nisur përgatitjet që seanca të përcillet në ambient të hapur, në sheshin “Skënderbeu”.

 “Do ta organizojmë në një mënyrë me një ekran shumë të madh ku do të ftojmë të gjithë qytetarët që ta shikojmë së bashku seancën bashkë me organizatat e dala nga lufta edhe bashkë shpresojmë që do të festojmë pas vendimit më 16”, ka thënë Besiana Musmurati, nënkryetare e komunës së Prishtinës.

Vendimin për bashkëluftëtarët e tyre po e presin me ankth edhe në Organizatën e Veteranëve të Luftës së UÇK-së. Nga kjo organizatë thonë se presin që vendimmarrja të bazohet vetëm në prova dhe fakte dhe jo në ndikime politike.

 “Si OVL-UÇK me ju tregu të drejtën në ankth po i presim këto ditë deri në më datën 16, ne gjatë gjithë kohës e kemi thënë që kjo gjykatë është e padrejtë, qysh kur është themeluar, pastaj e kemi parë që kjo gjykatë ka devijuar nga misioni për çka është themeluar, ju e dini që kjo gjykatë është themeluar mbi raportin e Dick Martyt, pastaj ky raport nuk përmendet fare më prej kur fillon procesi gjyqësor e themi lirisht nëse kjo gjykatë do të thirret mbi bazën e provave dhe fakteve jemi të bindur që bashkëluftëtarët tonë më 16 shtator do të jenë në shtëpitë e tyre”, ka thënë Gazmend Syla, nënkryetar i OVL-UÇK-së.

E pritja për aktgjykimin nuk është vetëm në Prishtinë. Në shumë komuna të Kosovës tashmë është vendosur “Ora e pritjes”, e cila numëron mbrapsht deri në momentin kur pritet të shpallet verdikti në Hagë.