Momente tensioni në Urën e Bruklinit/ Burri ecën mbi kabllot në lartësi të madhe, bllokohet trafiku

Një burrë ka shkaktuar alarm në Nju Jork pasi u ngjit mbi kabllot e Urës historike të Bruklinit, duke detyruar autoritetet të ndërhyjnë dhe të mbyllin përkohësisht trafikun në njërin krah të urës.

Pas një operacioni që zgjati disa orë, ai u zbrit në mënyrë të sigurt dhe u vu në paraburgim.

Ngjarja ndodhi të mërkurën pasdite, pak para orës 19:40 sipas orës lokale, kur kalimtarët dhe shoferët panë burrin duke ecur mbi kabllot e çelikut pranë njërës prej shtyllave karakteristike të Urës së Bruklinit.

Pamjet e publikuara në rrjetet sociale tregojnë burrin duke ecur dhe balancuar në një lartësi të konsiderueshme, ndërsa në vendngjarje mbërritën forca të shumta policie dhe ekipet e emergjencës.

Operacioni për ta zbritur zgjati disa orë, duke bërë që trafiku në korsinë lindore të urës, në drejtim të Bruklinit, të pezullohej gjatë orës së pikut.

Oficerët e Njësisë Speciale të Emergjencave arritën më në fund t’i afroheshin burrit dhe ta transportonin në një vend të sigurt. Më pas ai u vu në paraburgim.

Sipas mediave amerikane, dyshohet se burri po përballej me probleme të shëndetit mendor.

Qarkullimi në urë u rikthye rreth orës 22:00, pasi autoritetet përfunduan operacionin.

Ky nuk është rasti i parë i një incidenti të tillë në Urën e Bruklinit. Në vitin 2022, një tjetër person u ngjit mbi kabllot e urës, duke shkaktuar vonesa të gjata në trafik dhe një mobilizim të madh të ekipeve të shpëtimit.