Katari ka reaguar ashpër ndaj sulmeve me raketa iraniane në territorin e tij, duke akuzuar Teheranin për përshkallëzim dhe për rrezikim të stabilitetit në rajon.
Sipas Ministrisë së Jashtme të Katarit, kryeministri dhe ministri i Jashtëm Sheikh Mohammed bin Abdulrahman bin Jassim Al-Thani zhvilloi një bisedë telefonike me homologun iranian Abbas Araghchi për të diskutuar incidentin.
Gjatë telefonatës, ministri iranian deklaroi se raketat e lëshuara në territorin e Katarit kishin në shënjestër interesat amerikane dhe nuk synonin vetë Katarin.
Megjithatë, Al-Thani e refuzoi kategorikisht këtë pretendim, duke theksuar se sulmet goditën edhe zona civile dhe rezidenciale brenda vendit.
Sipas ministrisë së jashtme të Katarit, kryediplomati i vendit e cilësoi veprimin si një qasje përshkallëzuese, duke akuzuar Iranin se po përpiqet të dëmtojë fqinjët e tij dhe të tërheqë Katarin në një luftë “që nuk është e tyre”.
Al-Thani bëri thirrje për ndërprerjen e menjëhershme të sulmeve iraniane ndaj partnerëve rajonalë, duke theksuar se Katari vazhdon të favorizojë dialogun dhe diplomacinë për zgjidhjen e krizave.
Në të njëjtën kohë, ai paralajmëroi se vendi do të reagojë ndaj çdo shkeljeje të sovranitetit, sigurisë apo integritetit territorial, duke shtuar se agresioni ndaj Katarit nuk mund të mbetet pa përgjigje në përputhje me të drejtën e vetëmbrojtjes.
Deklaratat vijnë në një moment të tensioneve të larta në Lindjen e Mesme, ndërsa përplasja mes Iranit dhe Izraelit ka filluar të përfshijë gjithnjë e më shumë vende të rajonit.
Burimi: botasot.info
