​Microsoft do to shkarkojë deri në 9000 punonjës

Microsoft ka konfirmuar se do të shkarkojë deri në 9000 punonjës, në valën e fundit të zvogëlimit të stafit të gjigandit teknologjik gjatë këtij viti, sipas BBC.

Kompania tha se do të preken disa divizione, pa specifikuar se cilat, por raportet sugjerojnë se njësia e videolojërave Xbox do të jetë një nga të goditurat.

Microsoft ka planifikuar të investojë shumë në inteligjencën artificiale (AI), duke shpenzuar 80 miliardë dollarë në qendra të mëdha të të dhënave për të trajnuar modelet e AI-së.

Një zëdhënës i kompanisë i tha BBC-së: “Ne vazhdojmë të zbatojmë ndryshimet organizative të nevojshme për të pozicionuar më mirë kompaninë për sukses në një treg dinamik”.

Këto shkarkime përbëjnë rreth 4 për qind të fuqisë punëtore globale të Microsoft, që numëron 228,000 punonjës, transmeton kp.

Disa projekte të videolojërave gjithashtu janë prekur nga këto masa.

Microsoft ka nisur tre raunde të tjera të shkarkimeve gjatë vitit 2025, përfshirë atë të majit kur u njoftua për 6000 vende pune të hequra.

Një databazë zyrtare në shtetin e Washington tregon se më shumë se 800 nga pozicionet e eliminuara do të jenë të përqendruara në qytetin Redmond dhe në Bellevue, dy nga qendrat e Microsoft në shtetin e tyre amë.