Kryetari i komunës së Çairit dhe njëri nga liderët e VLEN, Izet Mexhiti në intervistën në “Dialog te Lajmi” ka thënë se VLEN funksionon shumë mirë si koalicion, nuk ka problem të funksionimit dhe ka një sinkronizim mes veti.
“Mund të them me përgjegjësi se edhe kur kam qenë pjesë e ish subjektit, ka pasur me shumë përplasje, dallime se sa tash që jemi brenda VLEN, këtu është indirekt edhe Vetëvendosje dhe Lëvizja Arbëria, (gjashtë subjekte) dhe kjo nuk është karakteristikë te shqiptarët, sepse janë mësuar historikisht të shohin përçarje dhe përplasje, por fatmirësisht po ndodhë e kundërta, kemi fuzionu edhe subjekte tjera brenda nesh dhe për hir të vërtetës, vlerësoj se mënyra më e mirë për të rritur potencën politike, VLEN duhet të shndërrohet në një subjekt politik”, ka thënë Mexhiti, duke shtuar se faktorët dhe argumentet shkojnë në drejtim të asaj që VLEN të jetë një.
Në këtë drejtim, sipas tij, brenda kryesisë dhe liderëve të VLEN kjo çështje është rihapur edhe pas zgjedhjeve me argumente pro dhe kontra dhe me ide konkrete.
“Ka pasur një ide rotacioni të katër liderëve, një ide e bashkëkryetarëve që ka funksionuar në disa shtete. Janë duke u shoshitur disa ide për të gjetur modelin më të mirë se si të fuqizohet edhe më tepër VLEN”, ka thënë tutje Mexhiti.
Lidhur me Rezolutën që miratoi BDI në Kongres për betonizimin e konceptit unitar të shtetit, Mexhiti me koment se kjo nuk dallon aspak nga koncepti i partive maqedonase.
“BDI në vazhdimësi këto 15 muaj flet për degradim të çështjes shqiptare dhe kur shqiptarët presin ndonjë ide kreative se si të fuqizohet apo faktorizohet elementi shqiptar, BDI në Kongresin e saj doli me Rezolutë se si ta betonizojnë unitarizmin e këtij shteti, apo shtetit unitar. Nuk dallon aspak nga koncepti i VMRO-së, LSDM-së dhe Levicës, është një vardisje ndaj palës maqedonase me koncept unitar”, ka nënvizuar Mexhiti.
Burimi: alfax.mk
