1
Shkup/Bruksel, 22 dhjetor – Komisioni Evropian (KE) tha sot se ka ndërprerë shpërndarjen e fondeve për sektorin bujqësor të Maqedonisë së Veriut, për shkak të një rasti ryshfeti që lidhet me fondin bujqësor IPARD III të BE-së për bujqit e vendit, shkruan dtt-net.com, transmeton Zhurnal.mk.
“Në rrethanat aktuale, si një masë standarde parandaluese për të mbrojtur buxhetin e Bashkimit Evropian, Komisioni ka vendosur të ndërpresë afatin e pagesës për deklarimin e shpenzimeve për tremujorin e tretë të vitit 2025 në kuadër të programit IPARD III”, tha një zëdhënës i KE-së për dtt-net.com.
“Meqenëse po merremi me paratë e taksapaguesve të BE-së, presim që autoritetet e Republikës së Maqedonisë së Veriut të vazhdojnë ta marrin shumë seriozisht këtë çështje. Komisioni është i gatshëm të vazhdojë të mbështesë fermerët, sektorin agro-ushqimor dhe zonat rurale të Maqedonisë së Veriut në të ardhmen, me kusht që interesat financiare të Bashkimit Evropian të mbrohen siç duhet”, shtoi zëdhënësi.
Zëdhënësi nuk sqaroi shumën e parave të pezulluara.
Pesë persona, përfshirë një drejtor të një agjencie publike, u arrestuan në fillim të nëntorit me akuzën e dhënies dhe marrjes së ryshfetit me një kompani vendase.
Për shkak të këtij rasti, Ministria e Financave e Maqedonisë së Veriut ka pezulluar gjithashtu pagesat e mëtejshme për projekte të tjera të këtij sektori.
BE-ja ka ndarë gjithsej 97 milionë euro për fondin IPARD III të Maqedonisë së Veriut për periudhën 2021-2027, nga të cilat 7 për vitin 2021, 8 për vitin 2022, 12 për vitin 2023, 15 për vitin 2024, 17 për vitin 2025, 18 për vitin 2026 dhe 20 për vitin 2027.
KE-ja ka pezulluar gjithashtu shpërndarjen e 112 milionë eurove për qeverinë e Shqipërisë për shkak të një rasti keqpërdorimi të rreth 33 milionë eurove nga fondet IPARD II, dhe rasti është nën hetim, si nga KE-ja ashtu edhe nga autoritetet e Shqipërisë.
Burimi: zhurnal.mk
