Në kuadër të vizitave në Çair, kandidati për kryetar të Komunës së Çairit nga koalicioni VLEN, z. Izet Mexhiti, vizitoi familjen e legjendës së sportit shqiptar dhe botëror, Shaban Tërstena.
Shaban Tërstena është figurë e madhe dhe krenari kombëtare, i cili me arritjet e tij olimpike i ka dhënë Çairit dhe gjithë shqiptarëve një vend të veçantë në hartën e sportit botëror. Ai ka dëshmuar se edhe nga një vend i vogël mund të lindin kampionë që bëjnë tërë kombin të ndihet krenar.
Në këtë atmosferë të ngrohtë familjare dhe mikpritjeje tradicionale, z. Mexhiti theksoi se mesazhi i madh që përçon figura e Shaban Tërstenës është se me vullnet, vizion dhe guxim, nuk ka kufij për arritjet. Ky frymëzim është shembulli më i mirë për gjeneratat e reja dhe për gjithë Çairin.
“Ne synojmë që këtë frymë të sukseseve dhe krenarisë ta shndërrojmë në udhëheqje e vizion politik për Çairin e së ardhmes, një vend që do të nxjerrë figura të mëdha jo vetëm në sport, por edhe në art, kulturë dhe shkencë,” ka shkruar Izet Mexhiti.
VLEN mbetet e përkushtuar për të nderuar figurat kombëtare dhe për të mbështetur zhvillimin e gjeneratave të reja që do ta çojnë përpara shoqërin tonë.
