Kryetari i Komunës së Çairit, Izet Mexhiti, mori pjesë sot në ceremoninë e vendosjes së gurthemeleve të kampusit të ri të Universitetit “Nënë Tereza” në Shkup, një projekt me vlerë rreth 42 milionë euro, që përfaqëson investimin më të madh të deritanishëm në arsimin shqip në Maqedoni.
Kampusi i ri universitar do të ndërtohet sipas standardeve moderne dhe do të ofrojë kushte bashkëkohore për studim, kërkim shkencor dhe zhvillim akademik, duke e shndërruar Shkupin dhe Çairin në një qendër të rëndësishme universitare për shqiptarët, në vend dhe në rajon.
“Vendosja e gurthemeleve të këtij kampusi është një moment historik për arsimin shqip. Investimet në arsim janë investimet më të rëndësishme për të ardhmen e një kombi, sepse aty ku ndërtohen universitete ndërtohet fuqia intelektuale, akademike dhe profesionale e shoqërisë,” theksoi Kryetari i Komunës së Çairit, Izet Mexhiti.
Sipas tij, ndërtimi i kampusit të Universitetit “Nënë Tereza” do të krijojë mundësi të reja për të rinjtë shqiptarë që të studiojnë në një universitet modern dhe në gjuhën e tyre, duke i përgatitur për sfidat e tregut global të dijes dhe ekonomisë.
Ky projekt përfaqëson një hap të rëndësishëm për zhvillimin e arsimit të lartë në vend dhe një investim strategjik që do të ndikojë për dekada në zhvillimin akademik, shkencor dhe shoqëror.
