“Nuk flasim vetëm për ndërtesa e infrastrukturë, por për një investim për të ardhmen tonë, për të rinjtë dhe gjeneratat që do ta ndërtojnë këtë shtet.” Kështu ka thënë zëvendëskryeministri i parë dhe kandidati i VLEN-it për Çairin, Izet Mexhiti, duke prezantuar vizionin e tij për arsimin e lartë. Ai e ka cilësuar kampusin e ri të Universitetit “Nënë Tereza” në Shkup, me vlerë mbi 35 milionë euro, si projektin më të madh strategjik për shqiptarët e Çairit dhe gjithë Maqedonisë së Veriut, duke e vlerësuar këtë universitet si institucion me rëndësi kombëtare, rajonale dhe evropiane.
Sipas Mexhitit, Çairi është shndërruar në qendër të arsimit të lartë shqiptar në kryeqytet, ku gravitojnë katër universitete me mijëra studentë dhe profesorë. Mexhiti vlerësoi se kampusi i ri do të hapë një kapitull të ri akademik, shkencor e kulturor, duke ofruar diploma konkurruese në nivel evropian dhe duke frenuar emigrimin e të rinjve.
“Arsimi në gjuhën shqipe nuk është luks, por e drejtë dhe realitet. Ky kampus do të jetë vend ku krijohet e ardhmja,” ka përfunduar mesazhin e tij zëvendëskryeministri i parë dhe kandidati i VLEN-it për Çairin, Izet Mexhiti.
