Kompania amerikane e teknologjisë Meta ka pushuar nga puna qindra punonjës nga departamenti i saj i inteligjencës artificiale (IA), ndërsa në të njëjtën kohë po punëson ekspertë të rinj për laboratorin e saj më të ri të quajtur TBD Lab.
Sipas Axios, kompania arriti në përfundimin se projektet e saj të IA-së që kanë ekzistuar prej kohësh janë bërë shumë burokratike dhe të ngadalta, kështu që ky riorganizim synon të krijojë një sistem pune më të shkathët dhe efikas.
“Duke zvogëluar madhësinë e ekipit, do të kërkohen më pak konsultime të ndërsjella para se të merret një vendim, dhe secili anëtar do të ketë përgjegjësi, autoritet dhe ndikim më të madh”, shkroi drejtori i inteligjencës artificiale i Metës, Alexandr Wang, në një memo të brendshme, sipas një dokumenti të parë nga Axios.
Meta po shkurton rreth 600 vende pune në laboratorin e saj të superinteligjencës, i cili punëson mijëra njerëz. Shkurtimet përfshijnë njësinë kërkimore të inteligjencës artificiale FAIR, departamentet që lidhen me zhvillimin e produkteve të inteligjencës artificiale dhe infrastrukturën e inteligjencës artificiale, ndërsa Laboratori i ri TBD mbetet i kursyer për momentin.
Kompania inkurajon ata që preken nga shkurtimet e vendeve të punës të aplikojnë për pozicione të tjera brenda Meta dhe pret që shumica do të gjejnë një pozicion të ri brenda kompanisë.
Siç ka mësuar Axios, kryeshefi ekzekutiv Mark Zuckerberg shprehu shqetësim disa muaj më parë se projektet ekzistuese të IA-së nuk po sjellin rezultatet e dëshiruara ose përparimet teknologjike.
Kjo është pikërisht ajo që çoi në riorganizim, krijimin e TBD Lab dhe valën e punësimeve të kushtueshme që përkoi me investimin e Metës rreth 15 miliardë euro në Scale AI dhe ardhjen e Alexander Wang në krye të departamentit të IA-së, transmeton KosovaPress.
Burimi: botasot.info
