Vlera e tregut e Cole Palmer është zbuluar mes raportimeve që e lidhin atë me një largim të mundshëm nga Chelsea.
Që prej largimit nga Manchester City drejt “Stamford Bridge” në vitin 2023, Palmer është shndërruar në një lojtar kyç për Blutë.
Pasi ka fituar Ligën e Konferencës UEFA dhe Kupën e Botës për Klube të FIFA-s me Chelsean, anglezi synon të fitojë trofetë e mëdhenj, si Premierliga dhe Liga e Kampionëve. Megjithatë, këtë javë u hodh një “bombë” e madhe, duke pretenduar se Palmer ndihet nostalgjik për shtëpinë dhe dëshiron të rikthehet në Manchester.
Sipas një raporti të “The Guardian”, Palmer është “homesick” dhe “po mendon për një rikthim në Manchester” në verën e vitit 2026, me Manchester United si destinacion të mundshëm, dhe jo ish-klubin e tij City.
Ndërkohë, “The Sun” sugjeroi se 23-vjeçari nuk po “e shijon jetën në jug” dhe se i “mungojnë” miqtë e tij nga Manchesteri.
Tani, mes raportimeve që e lidhin atë me një largim nga Chelsea, është zbuluar edhe vlera e tregut e Palmer.
Së fundmi, “Football Observatory CIES” ka treguar se Palmer, 23 vjeç, vlen rreth 115.8 milionë paund.
Nga ana tjetër, “Transfermarkt” ka deklaruar se vlera e tregut e Palmer qëndron rreth 120 milionë euro.
Në të vërtetë, nëse Chelsea vendos të ndahet me Palmer, ata me siguri do të kërkojnë shuma shumë më të larta sesa shifrat e përmendura më sipër. Duke folur përpara ndeshjes së kësaj fundjave kundër Crystal Palace, trajneri i Chelseat, Liam Rosenior, u pyet për Palmer.
Ai tha: “Kam pasur shumë biseda me Cole dhe ai duket shumë i lumtur që është këtu, është vërtet shumë i lumtur këtu.
“Ai është një pjesë shumë e rëndësishme e planeve tona afatgjata. Është një lojtar i jashtëzakonshëm. Çdo lojtar kalon momente të vështira në karrierë, sidomos sa i përket dëmtimeve. Kjo nuk është aspak reflektim i cilësisë së tij.”
Rosenior shtoi: “Puna ime, puna e klubit, është t’i sigurojmë (Palmer) një ambient ku ai mund të performojë vazhdimisht në nivelin që dëshiron. Kishte zhgënjim në ndeshjen ndaj Brentford, jo sepse nuk ishte i lumtur, por sepse kishte dhimbje dhe nuk mund të luante në nivelin që dëshironte për klubin.
“Ai është një djalë i mrekullueshëm, por duhet të sigurohemi që të kujdesemi për të në mënyrën e duhur. Kjo është arsyeja pse nuk e kam përfshirë në ndeshjen e fundit. Kam rotuar skuadrën dhe do të vazhdoj ta bëj këtë. Dua të sigurohem që lojtarët ta kalojnë këtë periudhë me fitore dhe në shëndet të plotë, dhe Cole është një nga ata lojtarë”.
Burimi: botasot.info
