Meloni vulos rregullat e reja për të huajt në shkolla: Gjoba për prindërit që nuk mësojnë italisht, kufizim 30% për nxënësit

Qeveria italiane ka miratuar një dekret të ri për shkollat që vendos kufi prej 30% për praninë e disa kategorive të nxënësve të huaj në klasat e para, ndalon mbulimin e plotë të fytyrës në mjediset shkollore dhe parashikon gjoba deri në 1 mijë euro. Kryeministrja Giorgia Meloni e paraqiti paketën si një përpjekje për të nxitur integrimin dhe për të shmangur krijimin e “klasave-geto”.

Masa e miratuar nga Këshilli i Ministrave përcakton se në klasat e para të shkollës fillore, nxënësit me shtetësi joitaliane, të cilët nuk kanë lindur në Itali ose nuk kanë ndjekur të paktën dy vjet kopsht në vend, nuk duhet të përbëjnë më shumë se 30% të klasës.

Në shkollat e mesme të ulëta dhe të larta, kufiri prej 30% zbatohet në klasat e para për nxënësit me shtetësi joitaliane që nuk kanë përfunduar me sukses të paktën tre vite shkollore në sistemin arsimor italian.

Dekreti prek edhe përdorimin e burkës dhe nikabit. Në aktivitetet mësimore dhe jashtëmësimore, si edhe gjatë marrëdhënieve mes shkollës dhe familjes, ndalohet mbulimi i fytyrës në një mënyrë që e bën të pamundur identifikimin e personit. Përjashtime parashikohen vetëm për arsye të veçanta shëndetësore ose sigurie.

Shkelja e këtij rregulli dënohet me gjobë nga 200 deri në 1 mijë euro. Nëse shkeljen e kryen një i mitur, përgjegjësia financiare bie mbi prindin ose personin që ushtron përgjegjësinë prindërore.

Një tjetër pjesë e paketës lidhet me njohjen e gjuhës italiane nga familjet e nxënësve. Në rastet kur vështirësitë e mëdha gjuhësore të prindërve pengojnë integrimin shkollor të fëmijës, shkolla duhet ta sinjalizojë rastin te shërbimet sociale. Prindërve do t’u ofrohen kurse falas të gjuhës italiane.

Ministri italian i Arsimit, Giuseppe Valditara, deklaroi pas mbledhjes së qeverisë se mosndjekja e programit të përcaktuar për mësimin e italishtes mund të sjellë gjoba nga 200 deri në 1 mijë euro. Një version paraprak i dekretit parashikonte edhe mundësinë e largimit të fëmijës nga familja në rast mosbashkëpunimi, por kjo dispozitë nuk figuron në versionin e përshkruar nga ministri pas miratimit të masës.

Meloni tha se objektivi është që shkolla të integrojë nxënësit pa hequr dorë nga rregullat. Sipas saj, kufiri prej 30%, forcimi i mësimit të italishtes dhe ndalimi i burkës e nikabit synojnë të shmangin përqendrimin e nxënësve të huaj në klasa të veçanta dhe t’u krijojnë të gjithëve mundësi të njëjta arsimimi.

Masat kanë shkaktuar edhe kundërshtime politike. Opozita italiane ka kritikuar veçanërisht mënyrën se si qeveria po e trajton integrimin e fëmijëve të huaj, ndërsa debati pritet të vazhdojë gjatë shqyrtimit parlamentar të dekretit.