Mariska Hargitay ka dyfishuar suksesin në Emmy Awards. Aktorja e njohur u nderua me dy çmime gjatë natës së parë të Creative Arts Emmy Awards, të mbajtur të shtunën në Los Angeles.
Dokumentari i saj, “My Mom Jayne: A Film by Mariska Hargitay”, fitoi çmimin për Dokumentarin ose Specialin më të Mirë Jo-Fiksion, ndërsa Hargitay u shpall fituese edhe në kategorinë Regjia më e Mirë për një Program Dokumentar/Jo-Fiksion.
Filmi është një rrëfim tejet personal për nënën e saj, ikonën e Hollywood-it, Jayne Mansfield, dhe eksploron jetën, karrierën dhe vdekjen tragjike të saj. Hargitay ishte vetëm tre vjeçe kur Mansfield humbi jetën në një aksident automobilistik në vitin 1967.
Për Hargitay, ky sukses vjen 20 vjet pas Emmy-t të saj të parë, të fituar në vitin 2006 për rolin e detektives Olivia Benson në serialin e njohur “Law & Order: Special Victims Unit”.
Dokumentari, i cili shënon edhe debutimin e Hargitay si regjisore, sjell fotografi dhe materiale të rralla për Jayne Mansfield, duke ndërthurur kujtimet familjare me historinë e një prej figurave më të njohura të Hollywood-it.
Fitorja e dyfishtë vjen pak ditë para një tjetër momenti të rëndësishëm për Hargitay: ajo do të jetë prezantuesja e ceremonisë kryesore të Emmy Awards 2026, e cila do të mbahet më 14 shtator.
Burimi: botasot.info
