Reshjet e fundit të shiut kanë nxjerrë në pah një problem serioz mjedisor në Liqenin e Badovcit, ku sasi të mëdha mbeturinash janë grumbulluar përgjatë brigjeve dhe në sipërfaqen e ujit. Shishe plastike, ambalazhe dhe mbetje të tjera urbane shihen të shpërndara në masë, duke ndotur rëndë këtë zonë.
Sipas banorëve të zonës dhe që e frekuentojnë liqenin, mbeturinat vijnë kryesisht nga përrenjtë dhe rrjedhat përreth liqenit, të cilat pas reshjeve i bartin mbetjet drejt ujërave të liqenit. Kjo gjendje paraqet rrezik për ekosistemin ujor dhe cilësinë e ujit, veçanërisht duke pasur parasysh rëndësinë e Liqenit të Badovcit për furnizimin me ujë të pijshëm.
Kërkohet ndërhyrje urgjente nga institucionet përgjegjëse për pastrimin e mbeturinave, si dhe masa parandaluese për të shmangur ndotjen e përsëritur.
Qytetarët që e frekuentojnë këtë liqen, theksojnë nevojën për menaxhim më të mirë të mbetjeve dhe rritje të vetëdijes qytetare.
Burimi: botasot.info
