Asambleisti i LDK-së në Kuvendin Komunal të Obiliqit, Labinot Mirena, ka dhënë dorëheqje të parevokueshme nga të gjitha strukturat e partisë, pas qëndrimit të grupit parlamentar të LDK-së për projektligjin që parasheh ndryshime në ligjin për Gjykatën Speciale.
Mirena ka thënë se nuk pajtohet me vendimin e LDK-së për të mos e votuar projektligjin, duke e cilësuar këtë çështje si një dallim parimor dhe personal.
“Ky vendim shpreh mospajtimin tim të thellë me qëndrimin e LDK-së ndaj krerëve të UÇK-së që po gjykohen në Hagë. Për mua, kjo nuk është vetëm çështje politike apo partiake, por çështje parimesh dhe bindjesh personale, mbi të cilat nuk mund të bëj kompromis”, ka shkruar Mirena.
Ai ka bërë të ditur se mandatin e tij në Kuvendin Komunal të Obiliqit do ta vazhdojë si asambleist i pavarur.
Mirena ka theksuar se qëndrimi i LDK-së për këtë çështje bie ndesh me vlerat dhe bindjet që ai përfaqëson.
Burimi: botasot.info
