Kryeministri i Kosovës, Albin Kurti, gjatë qëndrimit në Nju Jork për Asamblenë e Përgjithshme të Organizatës së Kombeve të Bashkuara (OKB), ka takuar presidentin e Bankës Botërore, Ajay Banga.
Kurti ka bërë të ditur përmes një postimi në Facebook se në takim është diskutuar për zhvillimet ekonomike në Kosovë, përfshirë largimin e vendit nga lista e shteteve të brishta e në konflikt, kalimin nga marrës në donator të Agjencisë Ndërkombëtare për Zhvillim, si dhe rritjen ekonomike.
Ai ka thënë se gjatë mandatit të ardhshëm qeverisës, fokusi do të jetë në rritjen e cilësisë së vendeve të punës dhe pagave, si dhe në rritjen e pjesëmarrjes së të rinjve dhe grave në tregun e punës.
Postim i plotë:
Gjatë qëndrimit në New York për Asamblenë e Përgjithshme të OKB-së, sot takova edhe Presidentin e Bankës Botërore z. Ajay Banga.
Me Presidentin e BB-së diskutuam për progresin e jashtëzakonshëm të Kosovës në vitet e fundit, heqjen nga lista e shteteve të brishta e në konflikt, tranzicionin nga marrës në donator të Agjencisë Ndërkombëtare për Zhvillim, dhe rritjen e vazhdueshme ekonomike.
Theksova se për mandatin qeverisës në vijim, pas uljes së papunësisë nga 26% në 10%, fokus do të jetë rritja më cilësore e vendeve të punës e që paguhen më shumë, por edhe rritja e pjesëmarrjes së rinisë dhe grave në tregun e punës. Gjithashtu, përmenda nevojën për të orientuar remitencat dhe kursimet e mërgatës sonë drejt sektorëve produktivë në ekonomi.
Në anën tjetër, Presidenti Banga prezantoi planin e tij për t’i mbështetur shtetet anëtare në krijimin e vendeve më cilësore të punës përmes fushave si ndërtimtaria, bujqësia produktive, shëndetësia, turizmi dhe prodhimtaria.
Burimi: botasot.info
