Kurti në takim me Soorensen: Tërheqja e letrës së Bërnabiqit, kusht për dialog të besueshëm me Serbinë

Kryeministri në detyrë i Republikës së Kosovës, Albin Kurti, priti sot në takim Përfaqësuesin e Posaçëm të Bashkimit Evropian për Dialogun Kosovë–Serbi, Peter Sørensen. Ky ishte takimi i parë mes tyre pas zgjedhjeve të 28 dhjetorit.

Gjatë takimit, Kryeministri Kurti theksoi se rezultati zgjedhor ka prodhuar një legjitimitet të ri demokratik, i cili garanton parashikueshmëri politike dhe stabilitet institucional, duke forcuar funksionimin e rendit kushtetues të Republikës së Kosovës.

Sipas tij, ky legjitimitet i lartë, i dalë drejtpërdrejt nga vullneti i qytetarëve, siguron përfaqësim të drejtë, kredibil dhe parimor të Kosovës në procesin e dialogut. Ndërkohë, Kurti vlerësoi se një legjitimitet i tillë nuk mund të thuhet se ekziston për lidershipin aktual në Serbi.

Kryeministri shprehu gatishmërinë e Kosovës për normalizim të plotë të marrëdhënieve me Serbinë dhe për dialog konstruktiv në Bruksel, duke theksuar si të domosdoshme tërheqjen e letrës së ish-kryeministres Ana Bërnabiq, të deponuar në Shërbimin Evropian për Veprim të Jashtëm (EEAS), dorëzimin e kryeterroristit Millan Radoiçiq – ndaj të cilit ekziston aktakuzë 160-faqëshe nga Prokuroria e Republikës së Kosovës – si dhe nënshkrimin e Marrëveshjes Bazike dhe Aneksit të Zbatimit.

Ai nënvizoi se vetëm përmes zbatimit të plotë të Marrëveshjes Bazike të Brukselit dhe Aneksit të Zbatimit të Ohrit, dialogu Kosovë–Serbi mund të prodhojë rezultate të qëndrueshme dhe të besueshme për të ardhmen.