Një zjarr i rrezikshëm që shpërtheu sot në afërsi të fshatit Luboten është vënë nën kontroll falë reagimit të shpejtë të Njësisë Intervenuese të Zjarrfikësve dhe ndihmës së banorëve lokal. Lajmi u bë i ditur nga kryetari i Komunës së Butelit, Darko Kostovski, përmes një postimi në Facebook.
“Zjarri në Luboten është vënë nën kontroll!”, shkruan Kostovski, duke falënderuar ekipin e krizës të komunës, njësinë intervenuese të zjarrfikësve, zjarrfikësit e Shkupit si dhe banorët e zonës që reaguan me kohë për të parandaluar përhapjen e mëtejshme të flakëve.
Sipas Kostovskit, zjarri ishte shumë pranë shtëpive të para në këtë vendbanim, çka rrezikonte dëme të mëdha materiale dhe kërcënim për jetën e banorëve.
“Çdo nderim për të gjithë ata që morën pjesë në këtë ndërhyrje”, përfundon postimi i tij kryetari i Butelit.
Zyrtarët lokal nuk raportuan për të lënduar, por theksuan nevojën për vigjilencë të shtuar në këtë periudhë të nxehtë verore.
